ຄະນະຮັບຜິດຊອບ ຈະລົງກວດກາແກ້ໄຂບັນຫາຫາງສຽງເນືອງນັນ  ໃນ ນວ

ທ່ານ ນາງ ວິໄລວອນ ຈັນທະລາຕີ ຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ ນວ)ທັງເປັນຫົວໜ້າຄະນະຮັບຜິດຊອບແກ້ໄຂສຽງເນື່ອງນັນຂົງເຂດການບໍລິຫານທຸລະກິດຮ້ານອາຫານ, ຮ້ານບັນເທີງ ແລະ ຮ້ານກິນດື່ມຂັ້ນ ນວ ແລະ ທ່ານ ພັທ ອິນພອນ ບຸນພະຈັນ ຮອງຫົວໜ້າຫ້ອງສັນຕິບານ ກອງບັນຊາການ ປກສ ນວໄດ້ຖະແຫຼງແຈ້ງເຖິງຜູ້ປະກອບການທຸລະກິດ, ຮ້ານອາຫານ, ຮ້ານກິນດື່ມ, ຮ້ານບັນເທີງ ຕະຫຼອດຮອດການຈັດຕັ້ງ ແລະ ປະຊາຊົນ  ທີ່ເຄື່ອນໄຫວ ແລະ ດໍາລົງຊີວິດ ໃນ ນວ ໃນວັນທີ 27 ຕຸລາຜ່ານມາ ໃຫ້ຮັບຊາບກ່ຽວກັບການແກ້ໄຂບັນຫາສຽງເນື່ອງນັນ ຢູ່ ນວ.

    ທ່ານ ນາງ ວິໄລວອນ ຈັນທະລາຕີ ໄດ້ຖະແຫຼງໃຫ້ຮູ້ວ່າ: ອົງການປົກຄອງນະຄອນຫຼວງວຽງຈັນ ໄດ້ພະຍາຍາມແກ້ໄຂບັນຫາສຽງເນື່ອງນັນຂອງບັນດາຮ້ານອາຫານ, ຮ້ານກິນດື່ມ ແລະ ຮ້ານບັນເທີງ ທີ່ສົ່ງຜົນກະທົບໃຫ້ແກ່ປະຊາຊົນທີ່ຢູ່ອ້ອມຂ້າງ ຊຶ່ງຜ່ານມາທາງຄະນະຮັບຜິດຊອບ ໄດ້ມີການລົງສໍາຫຼວດບັນຫາດັ່ງກ່າວ ເພື່ອນໍາມາປຶກສາຫາລື ແລະ ຊອກວິທີແກ້ໄຂ. ນວ ຈຶ່ງໄດ້ອອກຂໍ້ຕົກລົງແຕ່ງຕັ້ງຄະນະຮັບຜິດຊອບແກ້ໄຂສຽງເນື່ອງນັນ ໃນຂົງເຂດທຸລະກິດຮ້ານອາຫານ, ຮ້ານບັນເທີງ, ຮ້ານກິນດື່ມ ພະແນກ ຖວທ, ເຈົ້າໜ້າທີ່ຕໍາຫຼວດ ແລະ ສື່ມວນຊົນ.ກ່ຽວກັບການແກ້ໄຂບັນຫາດັ່ງກ່າວ ຊຶ່ງໄດ້ກໍານົດໃຫ້ບັນດາຮ້ານອາຫານ, ຮ້ານກິນດື່ມ ແລະ ຮ້ານບັນເທີງ ປະຕິບັດດັ່ງນີ້: ສໍາລັບເຈົ້າຂອງຮ້ານອາຫານ ທີ່ຖືໃບອະນຸຍາດດໍາເນີນທຸລະກິດຮ້ານອາຫານ ແມ່ນຕ້ອງຂາຍອາຫານເປັນຫຼັກ ຖ້າຮ້ານອາຫານໃດທີ່ມີສານເສບຕິດ ຫຼື ເປີດເຄື່ອງສຽງ ຕ້ອງມີໃບອະນຸຍາດ (ຕາມມາດຕາກົດໝາຍວ່າດ້ວຍການທ່ອງທ່ຽວ) ແຕ່ຮ້ານຕ້ອງເປັນຫ້ອງ ເພື່ອກັນບໍ່ໃຫ້ສຽງດັງອອກໄປລົບກວນຂ້າງນອກ, ສ່ວນຮ້ານທີ່ເປັນແບບເປີດ ທີ່ບໍ່ຕິດກັບຊຸມຊົນ ແມ່ນຈະບໍ່ອະນຸຍາດໃຫ້ເປີດເຄື່ອງສຽງດັງເກີນ 85 ດີຊີເບວ ແຕ່ຕ້ອງໄດ້ຮັບການກວດກາ ຈາກຄະນະຮັບຜິດຊອບ ແລະ ການຈັດຕັ້ງບ້ານ ລວມທັງເຂດໃກ້ຄຽງ, ສ່ວນຮ້ານໃດທີ່ມີການອອກໃບອະນຸຍາດເປີດເຄື່ອງສຽງ ຫຼື ເສບດົນຕີໄປແລ້ວນັ້ນ ແຕ່ສະຖານທີ່ບໍ່ເໝາະສົມ, ມີການຮ້ອງຟ້ອງຈາກປະຊາຊົນ, ຄະນະຮັບຜິດຊອບ ກໍຈະໄດ້ແຈ້ງໃຫ້ຂະແໜງການທີ່ອອກອະນຸຍາດແກ້ໄຂປັບປຸງໃບອະນຸຍາດຄືນໃໝ່ ໃຫ້ຖືກຕ້ອງສອດຄ່ອງກັບສະພາບຂອງຮ້ານ, ສໍາລັບການປະຕິບັດໂມງເວລາປິດຮ້ານອາຫານກາງແຈ້ງ ກໍານົດເວລາ 23 ໂມງ, ປິດດົນຕີ, ປິດບໍລິການຂາຍ ແລະ ປິດຮ້ານມອດໄຟ ເວລາ 24:00, ສໍາລັບຮ້ານບັນເທີງສະເພາະ ອີງໃສ່ດໍາລັດ 315 ວ່າດ້ວຍການບັນເທີງ ແມ່ນໃຫ້ປິດບໍລິການເວລາ 24:00 ໂມງ, ປິດການເສບດົນຕີ, ປິດຮັບແຂກເຂົ້າຮ້ານ ແລະ ໃຫ້ມ້ຽນຮ້ານປິດປະຕູບໍ່ເກີນ 1:00 ໂມງ (ກາງຄືນ), ສ່ວນຮ້ານອາຫານ, ຮ້ານກິນດື່ມ, ຮ້ານບັນເທີງ ທີ່ບໍ່ມີໜັງສືອະນຸຍາດຖຶືກຕ້ອງຕາມກົດໝາຍ ແມ່ນໃຫ້ຢຸດເຊົາການບໍລິການ ຖ້າພົບເຫັນຈະຖືກດໍາເນີນຄະດີຕາມກົດໝາຍ.
    ສະນັ້ນ, ຈຶ່ງຂໍຮຽກຮ້ອງໃຫ້ຜູ້ປະກອບການ ຈົ່ງເປັນເຈົ້າການຮ່ວມກັນໃນການປະຕິບັດກົດລະບຽບທີ່ທາງລັດວາງອອກຢ່າງເຂັ້ມງວດ ເພື່ອເຮັດໃຫ້ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ.
ຂ່າວ: ຍຸພິນທອງ(ຂໍ້ມູນ: ປກສ)